Coroncina e Rosario dell'Assunta
Origine: Castelbuono (PA)
Crunedda da Matri Sciusa (Assunta)
Quattru gigghia centu rosi
gesù cristu accussi vosi
corpu e carni a Matri Maria
mparadisu acchianata sia
cu stu rusariu u voli ntunari
a Bedda Matri l'avi a fari
cu du rusariu ni voli profittu
u dicissi comi fu scrittu
cu voli grazii e boni li spia
ci lu dicissi a Matri Maria.
MISTERO:
A quinnici d'austu u vosi u Patri Eternu
u triunfu di Maria supra u nfernu
Corpu e arma senza macula criata
sinn'acchiana a bedda matri Mmaculata.
GRANO piccolo:
No sepurcru di petra dura
nasciunu gigghia e nasciunu ciura
oh Gran Signura pi la vostra acchianata
na grazia a nuatri ni sia data.
MISTERO:
Pi guardari a bedda Matri no transitu ca fa
ogni ancilu du cielu u Signuri u manna cà
e l'apostuli e li santi cu affettu e firi pia
finu a quannu s'addurmisci a Gran Virgini Maria.
PRESENTAZIONE DEL SANTO ROSARIO ALLA MADONNA ASSUNTA
Stu rusario chi dittu avemu
a Vui Madonna l'apprisintamu
Oh Gesù mio, oh Gesù mio
guardati ch'è bedda la Matri di Dio. (X 2)
Siti bedda di maravigghia
ca di sant'Anna siti figghia,
e siti spusa di lu verbu sia
lu nomu di Gesù, Giuseppe e Maria. (X 2)
Oh Maria, stella Ariana
ca di lu cielu siti nobili e suvrana
scansatini Maria,
stella Ariana. (X 2)
Si ni scanzi la nostra arma,
o frisca rosa e virdi parma,
iu vi lu dugnu lu me cori e l'arma
c'e lu nemicu ca mi la tenta. (X 2)
A la punta di sta strata
c'è Gesuzzu cu la Vergine Maria,
San Giusipuzzu ch è lu tisureri,
e nì l'ansigna la bona via. (X 2)
Scansatini sta strata cu
tutta la cumpagnia.
evviva di lu Carminu Maria. (X 2)
SANTO ROSARIO DELLA MADONNA ASSUNTA
Ave Maria:
E deci milia voti
ludamu la nostra Regina:
n'curunata fu Regina
di l'eternità divina.
vinti/ treanta/quaranta/cinquanta
Al Gloria:
Maria l'Assunta n'celu
è di l'ancili adurata:
n'curunata fu Regina
di l'eternità divina.
SALVE REGINA DELL'ASSUNTA
Origine: Termini Imerese (PA)
Io vi salve Regina,
Maria, l'Assunta in cielu
pi vui senza lu velu
a Dio si godi. (X 2)
Cu tanti mezzi e modi
a Vui vurria ludari
a Vui vurria ludari
o Gran Regina. (X 2)
Vui siti la vicina
di lu tronu di Diu,
a Vui stu cori miu
sempri cunsignu. (X 2)
A Vui stu cori impignu
lu vostru santu aiuto
e non sarò pirdutu
pi la strada. (X 2)
Vui siti l'avvucata
di misiri peccaturi
e dunchi a tutti l'uri
a Vui priamu. (X 2)
A Vui raccumannamu
st'armuzza nostra afflitta
e di purtalla ritta
m'pararisu. (X 2)
E poi cu lietu visu
cantamu in armonia
viva, viva Maria
l'Assunta n'cielu. (X 2)
Litanie alla Madonna Assunta
A bedda Matri supra n'artari na rosa ivi a pusari cu gran sulennità
chi bedda curuna ca purtati ntesta si fa na granni festa pi tutta la città
chi bedda facciuzza è luci risplinnenti Maria matri Putenti ni cunsulirà
chi beddi capiddi su tanti fila d'oru amuri e ristoru pi cu la chiamirà
chi beddi ucchiuzzi su specchi i paradisu chiù gioia e chiù risu Maria ni darà
chi bedda vuccuzza parissi china i meli all'ancilu Rabrieli certu rispunnirà
chi beddi pumidda su du cirasi russi cu mpericulu fussi certu lu sarvirà
chi bedda sta vesta ch'è d'oru arraccamata siti patruna e avvucata pi tutta umanità
chi bedda cintula è tutta sita e rasu a duni a santu Masu e iddu cridirà
chi bedda scarpina aviti misa o peri c'è l'ancilu Rabrieli chi vi la guardirà
chi peri dilicatu c'aviti cara Matri u dimoniu ci scacciati e ni libirirà
chi beddu stu mantu c'hè granni quantu u mari ni ci ati a riparari matri da carità
chi beddi sti pedini su tutti argentu pi ogni mumentu Maria ni uaridirà
chi beddu anidduzzu c'aviti misu a manu u Diu patri e Suvranu dunari vi lu vò
è quinnici d'austu a rosa spampinavu maria ncelu acchianavu pi una eternità
che bedda trapassioni o ancili du celu spincitici su velu ca acchianirà
e di l'eternu patri sta granni e summa matri curuna n'avrà
e dudici stiddi s'addumaru tuornu a testa si sistimaru
dintra u sipurcru nasciunu rosi e gigghia pi na cussi granni figghia
ca ncelu acchianò.
l'ancilu Micheli ci porta a menza luna, Raffieli ci porta na rosa
Maria u peri ncelu posa e gran festa si farà
(Dalla voce della Signorina Giuseppa B.)