U cantu da Matruzza
Origine: Castelbuono (PA)
Oh Matri di lu carmini ca sona
Ca voli ditti la Sarvi Rigina
Quannu Maruzzedda iava sula
Cuntenta era Sant'Anna e San Jachinu
Quannu la gran signura ia a la scola
Chi immaredda di setti culura!
La maistra la chiamava Battiola
picchì vinisti tardi sta matina?
avutu a ma mammuzza malatedda
E unn'aiu avutu chiddu ca ci dari
E ci aiu datu zuccaru e cannedda
Tutti li cosi di lu spiziali
La gran signura poi si maritavu
Cu san Giuseppi lu lignamareddu
E l'ancilu di Diu pua l'annuziavu
C'avia a nasciri lu Bambineddu
Nascivu 'nta la rutta puvireddu
Cu quattru fasci e quattru pannizzedda
Sunavanu i pastura i ciarameddi
E l'ancili cantavanu attorniati
Quannu la gran Signura iaa a lavari
li pannizzedda di Nostru Signuri
l'ancilu c'aiutava a 'nzapunari
ci li stinnia supra rusi e sciuri
Gesuzzu DEiu chianceva pi la minnuzza
So mamma ci nni dava sempri una
una minnuzza ia ti pozzu dari
L'autra l'aiu a sarvari e piccatura
Quannu la gran Signura ia a la fera
C'ivi accattari trim anni di linu
So figgi ci chiancia pi la bannera
So matri c'accattau lu tammurinu
E sempri ci dicia – sona, ca sona ora
Passa l'ancilu divinu!
Quannu grannuzzu Gesù addivintau
Cu San Giuseppi quantu travagghiau
Tutti li tavuliddi c'accampava
Cruci e cruciddi lesti ni facia
La gran Signura idda addumannava
C'avia a fari cu tutti sti crucidda
Cu vucca duci duci arrispunnia
ca supra c'arristari l'arma mia!
E vinni puru u tempu da passioni
Lu cristu 'nta la cruci fu 'nchiuvatu
Chiancennu arripitannu strata strata
Lu iava circannu a matri Addulurata
Appena u scinneru di la Cruci
Si l'abbrazzau mortu la so matri
'ncelu vulavu Cristu redenturi
Cu gran triunfu e cu granni amuri
E quinnici d'austu cu gran festa
'ncelu sinn'acchianavu la gran signura
Assiemi a San Giuseppi e lu signuri
Assistinu a nuatri piccaturi!