Preghiere della giornata
Atti di ossequiu a Diu pri la mattina
In nomu di lu Patri, e di lu Figghiu, e di
lu Spiritu Santu. Accussì è.
Adorazioni
V’amu, e aduru, e ccu ogni affettu
Vi offerisciu l’intellettu,
La memoria, e voluntà,
Santa Eterna Trinità.
In ogni strofa si pò aggiungiri
Gesù miu, misericordia:
Gesù miu, misericordia,
Gesù miu, di nui pietà.
Ringraziamentu
Vi ringraziu, o Diu d’amuri,
Di li grazii, e li favuri,
Vui mi aviti, già criatu,
Ricumpratu, e conservatu.
(Vui… conservatu = Voi mi avete già creato, riscattato e salvato)
Offerta di l’azioni a Gesù Cristo
O Gesù, ccu vui mi unisciu,
Ogni azioni a vui offerisciu,
Tuttu a vostra gloria sia:
Vui riggiti ogni opra mia.
Applicazioni di l’indulgenza, e di lu beni ca la S. Chiesa Catolica
Sentu, o Diu, fari di cca,
E mi appropriu quantu fa
La Catolica Romana
Matri Chiesa Cristiana.
Preghiera pri tutti
Dati ajutu a mia, Signuri,
A li mei benefatturi,
A li morti, a boni, a mali,
A la chiesa universali.
Intercessioni di li meriti di Gesù Cristo
Nenti, o Diu, nui meritamu,
Ma pietà vi domandamu,
Pri li meriti, e l’amuri
Di Gesù nostru Signuri.
Preghiera a Maria SS.ma e li Santi
Di lu Lumi, o Matri pia,
Protegitimi, o Maria.
Santi, ed Angeli Avvucati,
Tutti a Diu pri nui prigati.
- Pater noster
- Ave Maria
- Credo
- 3 Gloria Patri
- Requiem Aeternam etc.
Doppu l’orazioni mentali, o almenu doppu qualchi brevi considerazioni supra li massimi eterni disposti a jurinata un pocu chiù sutta, si dumanda la grazia di fujri lu viziu, speciamenti lu chiù dominanti, e di praticari dda virtù necessaria ad ognunu: e si po’ fari lu seguenti attu.
Protesta e prighiera
Ogni viziu lassirò,
La virtù prattichirò:
Vui fra tantu, o Gran Buntati,
Ogni grazia a mia accurdati.
- Tri Ave Maria a la Parità di Maria SS.
Li meditazioni corrispondenti a li massimi, e punti supraditti, ed autri meditazioni, ca servunu i materia a l’azioni mentali, ccu lu metudu pratticu, chi pri maggiuri brevità si sunnu tralasciati, si trovanu ‘ntra lu Librettu intitulatu lu Pane Cutidianu dill’animi, di lu stissu auturi.
Azioni santificanti ‘ntra la jurnata
A lu pricipiu di ogni azioni spirituali, e temporali, Missa, Rusariu ec. Travagghiu, pranzu, cena ec., fattu lu signu di la S. Cruci si po’ replicari l’Offerta.
Visitandu Gesù ‘ntra lu Santu Tabernaculu
V’amu, e aduru, o veru Diu,
Ca pria muri, e beni miu
Stati misu carzaratu,
Gesù miu Sagramintatu.
Prima di la Confessioni Sacramintali
Dati a mia lumi, e duluri
Pri accusarmi di ogni erruri,
E la grazia, o Diu accurdati
Di lassari li piccati.
Doppu la Confessioni Sagramentali
Vi ringraziu... Oh chi gran fattu!
Diu ccu un Omu paci ha fattu!
Dati a mia, Bontà infinita,
Grazia a fari nova vita.
- Ad ognuna di li prighieri supra ditti si po’ aggiungeri lu Pater noster, l’Ave Maria, e Gloria Patri.
Ritiramentu spirituali pri la sira
A la presenza di Diu, fattu l’esami di coscienza, si ponnu recitari l’Atti di Fidi, Spiranza, e Carità, di Duluri, e di propositu, ccu la protesta di vuliri riciviri li Sacramenti di la Chiesa in vita, e in morti. Pri li quali Atti Cristiani si avverti: chi cui li recita una vota lu jornu pri lu spaziu di un misi; una vota lu misi a propria elezioni, cunfissatu e comunicatu, pregandu secundu l’intenzioni di lu Suppu Pontifici, guadagna l’indulgenza plenaria concessa da Benedittu XII. Si ponnu anchi replicari l’Atti di ossequi di la mattina. E standusi pri ripusari a lettu si po’ fari la seguenti Prutesta.
Ccu voi dormu; e a vui, miu Diu,
Dugnu l’arma, e corpu miu.
A lu viziu, e soi piaciri
Non ci sentu accunsintiri.
Si fa lu signu di la S. Cruci ripusandu cristianamenti ccu Gesù, ccu Maria, ccu l’Angelu Custodi e Santi Avvocati; ricitandusi lu Pater noster, Ave Maria, Gloria Patri.
Tratto da:
DIARIU BREVI
Pri li cristiani idioti
NON INUTILI AD OGNI AUTRU
datu novamenti alla luci
DA MONSIGNURI
D. MARTINU URSINI
VISCUVU DI PATTI
AD USU DI LA SO DIOCISI