Preghiere della Settimana Santa
Origine: Vita (TP)
Maria di st'acqua 'mpentami ('mprestami?) na junta
amantu duluri a vui Vergini santa
Canta lu 'ntellettu meu nun si cunfunta
oppuri è lu dimoniu chi mi ntanta.
Vurria, si la me menti ci la spunta,
cantari supra la simana santa
Maria di quantu razii si ni cunta
di la summa bontà Vergini santa.
Lunniri e santu
Ch'è dulurusu lu lunniri e santu
lu primu jornu di la passioni;
Maria persi lu figghiu e sferra 'nchiantu
e nuddu ci ni duna lisioni.
Maria è cuperta cu un nivuru mantu
e nuddu si smovi di cumpassioni,
la vogghiu dari a vui Spiritu Santu
chi Diu ni scansa di 'ntentazioni.
Martiri e santu
Martiri ch'è di sant'Anna gluriusa,
nanna du Gesù Cristu Nazzarenu,
E' Gesù Cristu lu veru messia
crucifizzatu 'mmezzu li Judei.
E fu nna lancia spiaturata ria,
amasanti (?) foru li peccati mei,
chiangi la scunsulata di Maria
chi avi lu figghiu 'mmezzu li Judei.
Mercuri e santu
Mercuri e santu di razii è chinu,
è riccu di tisori e santitati;
o specchiu di larona e di larinu
santificati li vostri bontati.
E morsi 'ncruci lu nostru Diu divinu
chi appi milli e tanti scurriati,
muristi 'ncruci, signuri, pi mia,
eu peccu e vui scuntati lu piccatu.
Joviri e santu
Joviri e santu cu li surdati ia,
cu cordi e cu catini 'ncatinatu,
ma cu lu vitti chi a la morti ia,
chistu è corpu bimignu sfracillatu.
E va chiangennu Maria pi la via
e ci batti lu cori 'nta lu pettu,
muristi n'cruci, Signuri, pi mia,
eu peccu e vui scuntati lu piccatu.
Vennari e santu
Vennari e santu circannu lu ia,
qualcunu nava (?) ci n'avivissi datu
ci arrispusiru e ci dissiru a Maria
ch'è 'nta sti strati sfracellatu.
Va chiangennu la Vergini Maria
na spata si senti trasiri nta lu pettu,
muristi n'cruci, Signuri, pi mia,
eu peccu e vui scuntati lu peccatu.
Sabbatu e santu
Sabbatu, chi jurnata d'allirizza:
e Maria santa allegra si sta,
aspetta lu figghiu so' ch'avi a viniri,
di mmezzu li Judei scappirà.
Sabbatu a mezziornu arrivisciu
a li celi celesti sinn'acchianau,
e Maria santa a lu munumentu iu
e a lu munumentu nun ci l'asciau (?)
"Giuvanni, l'hai vistu tu lu figghiu meu,
o puramenti cu si lu pigghiau?"
Ci arrispunniu l'angilu di Diu:
"Rallirizza, Maria: risuscitau!"