Preghiere di Ringraziamento Eucaristico
Attu di Acugghienza
Arma mia, stringi a lu pettuStu pietusu to Signuri,
Chistu Spusu to dilettu
Ca pri tia brucia d'amuri.
Ah! Signuri, e cui sugn'iu,
Ca ccu mia stari vuliti?
Ah! Nisciti... Ah! No, miu Diu:
Miu Gesù, non vi nni jiti.
Attu di Ringraziamentu
Comu rendu sti favuri?
Una vili creatura
Spusa già di lu Signuri!
Arma mia, pensaci ognura.
Miu Gesù, chi curtisia!
Chi putevu darmi chiui?
Vui vi dati tuttu a mia,
Iu mi dugnu tuttu a vui.
Attu di umiltà e di Petizioni
Diu stà chiusu intra di mia
Comu fu 'nsenu a Maria!
Ma Maria fu Santa e pura,
Ed iu indigna creatura.
Miu Gesù, santificati
La mia mala vuluntati,
La mia menti, lu miu cori,
Li pinseri, opri, e palori.
Mortu avistivu rizettu
'Ntra un seplulcru novu, e nettu;
Diu d'immensa puritati,
'Ntra stu cori comu stati?
Ccu lu vostru Corpu e Sangu,
D'ogni macchia, e impuru fangu,
D'ogni vili, o ingiustu affettu
Annittati lu miu pettu.
Gloriusu in Celu siti,
E lu cori a mia l'aviti!
Vui miu Diu, mi amati tantu,
Accurdatimi, o Signuri,
Di purtarvi veru amuri
Di pinsari sempri a vui,
E mai mai piccari chiui.
Fattu pani in apparenza
Omu, e Diu siti in essenza:
Chi amurusa invenzioni
Pr'iu ccu vui fari uniuni!
Dunca, o Diu, chi pretenditi
Iu e vui d'essiri uniti?...
Eccu a vui dugnu lu cori
Mentri campa, e quannu mori.
Quantu sforzu vi ha custatu
Lu viniri a un cori ingratu!
Ah! Pirchì, miu Diu benignu,
Tantu amuri a un cori indignu?
Ah! Giacchì, ccu tantu amuri
Vui vi dati a mia, Signuri,
A vui uniti st'arma mia
Ccà, e in Celu: accussì sia.
Orazioni tradutta
Anima di Gesù Santificatimi,
Corpu di Gesù Cristu vui sanantimi
Sangu di Gesù Cristu vui inebriatimi,
Acqua di lu custato so lavatimi,
Di Gesù passioni cunfurtatimi,
O Gesù summu beni esauditimi,
Intra li vostri chiaghi nascunditimi,
Non permettiti da vui separarimi
Nell'ura di la morti mia chiamatimi,
Ccu l'Angeli, e li Santi pri lodarivi
Pri tutti l'infiniti eterni seculi.
(Mortu... rizettu... = Da morto avete trovato pace in un seplocro nuovo e pulito)
Origine: Catania (CT)
Stu jornu l'arma mia si cunsulau
tutta si saziau virennu a Diu;
na tavula cunzata chi truvau
nun era degna di irici iu.
Pani celesti sta vucca mangiau,
e cu nun ni mangiau spinna di Diu;
ni voli beni picchì ni criau
e morsi 'ncruci pi' l'amuri miu.
Origine: Vita (TP)
Quannu si rapi lu santu tabernaculu,
dintra c'è chiusu lu me caru amuri;
quannu si rapi mi nesci lu ciatu,
cibari mi vurria na tutti l'uri.
"Figghia, nun pozzu chi sugnu carciratu,
li chiavi l'avi lu to' cunfissuri
e sugnu 'nchiusu comu un 'namuratu,
di nomi eu mi chiamu Sarvaturi"