Preghiere a Sant'Anna
Origine: Paceco (SR)
Matri Sant'Anna,
di Gesù fùsti nanna,
nanna fusti di Gesù,
Matri Sant'Anna, aiutami Tu.
Origine: Agrigento (AG)
(Preghiera delle gestanti)
Santa Matri di Maria
lu sgargiu affidu a tia
pi tri voti iu vi chiamu
fati nasciri stu cristianu
e sta matri sgravati
di duluri sarvati
Duci matri Sant'Anna
veni subitu a sta banna
e pruteggi sta partorienti
ca chiangi e stringi i renti
Santa matri beddra
aiutati sta fimmineddra.
Origine: Castelbuono (PA)
A MATRI SANT'ANNA A MARIA
Quannu nasciu a Virginedda
era duci e assai bedda
era tutta gigghia e sciura
ch'era bedda a criatura!
so Matri Sant'Anna si la strinci e si la vasa
'nta la naca la va posa
e cussi metti a cantari
"vo vo vo bidduzza mia faciti la vo
vo vo vo vo nicuzza duci chiuriti l'ucchiuzzi
sunnu stiddi di lu celu
l'ancileddi l'accinneru
sunnu stiddi di lu mari
tuttu u munnu i vulissi piscari.
nicuzza mia faciti la vo..
un si ni va la mamma to
sta cà o latu un t'a di scantari
nicuzza d'ori lassati u vigliari
pigghiatu un sonnu si zuccaru e canedda
faciti la vo picciridda bedda
nicuzza mia è avanti la sira
chiudi l'ucchiuzzi ca squagghiau la cira
comi su d'oru i capiddi 'ntrizzati
comi su rosi l'argiuzzi sciuruti
comi su d'ancili li to fattizzi
uocchi di celu e capiddi rizzi
duormi Maria ascuta a mamà
duormi ca l'ancilu ti sonnerà
vo vo vo bidduzza mia faciti la vo
vo vo vo vo nicuzza duci chiuriti l'ucchiuzzi
du Paradisu calavi u sunnuzzi"